Shanghtin

KIO/A Tingnyang-up Malai a Gasan Kaba (6) hte bai htang Mahtai
Htai ai wa - Salang Tu Awng
30 October 2007

Wunpawng Mungdan Shanglawt Hpung (KIO/A) gaw, October 22-24 ya laman, ‘KIO mying galai na ginlam’ hte seng nna, mungmasha datkasa ni de sanglang dan ai zuphpawng hpe Laiza Muklum uphkang shara e galaw wa sai re.

Zuphpawng de mungmasha de na salang ni, ramma hte dakkasu jawngma ni, hkristan hpung shagu de na woi awn sara ni hte laksan shaga tawn ai myitsu du salang ni sa du ai hta, KIO/A Tingnyang-up malai Du kaba Gauri Zau Seng a GASAN KABA (6) n’tsa, bawngban ai lam ni hpe galaw wa sai, rai nga ai.

Ndai Du kaba Gauri Zau Seng a Gasan Kaba ni n’tsa, Salang Tu Awng a Mahtai hpe yawng mu chye lu na matu yaw shada let, KNG kawn kahtap tang madun dat ai.

Gasan Kaba-1: KIO gaw NC sa lawm, ya NC ngut sai?
Htai - NC ngut tim mungshawa hkap la mai ai NC n re majaw, KIO gaw mungshawa hkap la ai democracy hte bung pre ai jet ai NC pru wa ai aten du hkra, naw shakut ra ai.

Gasan Kaba-2: NC ngut sai. Bungli ningnan galaw wa na matu, ganing re ai lahkam sa wa ra na kun?
Htai - KIO gaw, KIO NC hpe galaw ai n re. N.A.HP galaw ai kaw mungmasa shaga lu na matu, tang madun lu na matu, shanglawm ai sha re. KIO a bungli gaw, gap hkat jahkring nna, saboi n’tsa kaw mungmasa shaga ai kaw du hkra shakut shaja sa wa ra ai.

Gasan Kaba-3: Bungli galaw wa ai hta sabung nna, mying shamying wa ra ai. KIO gaw awmdawm shanglawt a matu dingyang galaw nga na myit ya nga ai kun? a. Awmdawm shanglawt lu na matu gasat ra ai. Gasat shangun mayu ai kun? b. Gasat nna awmdawm shanglawt lu na kun?
Htai – KIO gaw awmdawm shanglawt lu hkra ngu nna hpaw da ai uhpung re. Teng sai. Dai majaw dai ni du hkra ‘Rawtmalan Poi’ galaw nga ga ai. Raitim awmdawm hpe mungdaw a ahkaw ahkang kaba democracy hte bung pre ai ahkaw ahkang hpe galai mai nga ai. Sanat hte sha gasat nna shanglawt lu mai ai n re. Mungga hte gasat nna mung shanglawt lu mai ai. Gasat ra yang gasat na matu, laknak lang nga ga ai n rai ni.

Gasan Kaba-4: KIO hpe munghpawm hpe shangang shakang shangun mayu ai kun?
Htai - KIO gaw munghpawm hpe shangang shakang na matu hpaw da ai uhpung n re. Jinghpaw W.P amyusha ni dip sha hkrum ai kaw na lawt lu na matu rap ra ai tara lu la hkra, mungdan mungdaw ahkaw ahkang tup hkrak lu la ai shani du hkra, amyusha mungmasa lit la nna, galaw sa wa na matu hpaw da ai ‘amyusha mungmasa’ uhpung kaba re.

Gasan Kaba-5: Munghpawm gaw de sa wa na matu, KIO mying hte masha ni kam na ma ai kun?
Htai - KIO gaw munghpawm gaw de na matu hpaw da ai n re. Munghpawm kata na masha ni kam na n kam na ngu nna hpaw da ai mung n re. Munghpawm gaw de ai kaw Kachin ni shawnglawm ngut sai. 1947 ning Panglung Munghpawm hta shanglawm sai. Dai hpe hpunau Myen ni n hkan nna, amyu kaba lailen hte dip sha wa ai majaw rap ra ai tara n nga nna, anhte J.W sha ni a ahkaw ahkang hkrat sum wa ai majaw, paw pru wa ai KIO she re. Awmdawm shanglawt (snr) rap ra ai ahkaw ahkang lu la ai du hkra ngang grin nga ra na KIO re.

Gasan Kaba-6: Munghpawm kata na, kaga rudi amyusha ni, shada rau ta gindun, anhte shanglawt “I” hpe tek da, masu sha ai lam tai na kun? Anhte hpe kam na kun? Lata gindun na mara ai kun?
Htai – KIO gaw kaga munghpawm hpunau ni uhpung uhpawng ni hte bawngban nna, hpaw ai n re. Dai hte maren, munghpawm kaw lawm nga ai hpunau ni mung anhte Kachin ni hte bawngban nna hpaw ai, mying shamying ai, gara uhpung uhpawng mung n nga ai.

Ga shadawn-- Kayin ni mung ya du hkra ‘Kawtule Mungdan, Kawtule asuya’ nga nna, nga ma ai. Miwa Gumsan Mungdan hta mung ya du hkra Kumyunit dawnghkawn sha naw lang nga ma ai. Ya shanhte lang ai dawnghkawn gaw hkrak tsun ga nga yang Kumyunit Party dawnghkawn sha re. Mungdan dawnghkawn n re. Taiwan kaw lang ai she shanhte mungdan a dawnghkawn majing rai malu ai.

Dai re majaw, Du Kaba Gauri Zau Seng a Gasan ni yawng hkyawm yu ga nga yang, mying galai mayu ai sha re. Mying gaw n galai mayu tim aten du jang gaw galai ra na sha re.

Galai na rai yang gaw, mungdan ting rap ra ai tara pru wa yang (snr) Jinghpaw Wunpawng amyusha uhpung yawng pawng yang, myit yu ai baw sha rai na re. KIO mying galai na matu NC kaw shanglawm ai n re. KIO gaw, gap hkat jahkring nna mungmasa bawngban lu na matu NC kaw shanglawm ai re hpe yawng chye chyalu rai nga ai.



Ga kadun lachyum:
NC - National Convention (Mungbawng Zuphpawng)

KIO – Kachin Independence Organization

KIA – Kachin Independence Army

I – Independence (Shanglawt)

KIO/A – KIO hte KIA

N.A.HP – Myen hpyen asuya (Sate Peace and Development Council, SPDC)
(kachinnews) kaw na shaw madung ai..