Shanghtin

Karai Kasang kaw na mai kaja ai shaman chyeju hte
hpring tsup  nna wun li lu, wun dan tu ai (4) lang ngu na Wunpawng
Mungdan Shanglawt Amyu Shayi Masat Nhtoi kaba hta Wunpawng Mungdan
Shanglawt Amyu Shayi ni hte Mungkan Mungdan shara shagu nga hkawm nga
ai Wunpawng Amyu Shayi ni yawng hte ngwi pyaw hkam kaja nga myit ga
ngu shawng ningnan akyu hpyi dat nngai.

                  Ngai tut nawng kamhpa nga ai, ngai hte rau myit rum
ai Wunpawng Myu Shayi ni e..ya dai ni 2008 ning August shata (19) ya
du yang, Wunpawng Mungdan Shanglawt Amyu Shayi Hpung hpaw ai shaning
(30) ning hpring (31) ning de du kabye shang wa sai rai nga mali ai
hte (4) lang ngu na Wunpawng Mungdan Shanglawt Amyu Shayi  masat nhtoi
hpe galaw lu saga ai re.

                  Ndai shaning (30) ning laman anhte Amyu Shayi ni
galaw lai wa sai bungli ni hpe bai nhtang sumru dat yu ai shaloi,
anhte Amyu Shayi yawng gaw myit su myit rawt ai hte  ap nawng shakut
shaja ai majaw  awng dang ai lam lu la ging ai daram lu la nga saga ai
hpe shawng shakawn shagrau masat masa galaw dat nngai. Magam bungli
nkau ni hta chye chyang kung kyang  lam nlaw ai majaw ra ning ra ai
lam ni, tang ndu ai lam ni nga lai mat wa sai hpe myit dum ai.Du wa na
 ten ni hta grau nna awng dang lam lu la hkra grau shakut ra nga ga ai
lam hpe mu mada hkam la ai.

                  Wunpawng Mungdan Shanglawt Hpung Ginjaw Komiti gaw
2008 ning May shata (26) ya hta anhte Wunpawng Mungdan Shanglawt Amyu
Shayi Hpung hpe  shangang shakang lam masan ya sai hte maren, myu
shayi ni yawng gaw shawoi na hta grau nna myit n-gun lu, myit su myit
rawt ai lam ni nga na sai ngu kam ai.

                  Dai majaw anhte  Amyu Shayi ni yawng gaw grau nna
myit mang jahkrum, gahkyin gumdin ai hte myit n den marai sharawt nna,
Mungdan hte Amyu sha ni a rawt jat, lawt lu lam  rai nga ai rawt malan
magam bungli hta Kawa la ni hte rau li baw li mai Hka li jawm shap ai
zawn magam bungli shagu hta shara la gun hpai sa wa ga ngu shatsam dat
ai.

                   Amyu Shayi ahkaw ahkang lu la hkra tinang nan mung
gaw gap shakut la ra ga ai. Wunpawng myu  sha ni a masha jahpan hpe yu
dat yang grau law ai gaw Amyu Shayi ni rai nga ga ai, Num,La ahkaw
ahkang maren  mara nga ai nga tim myu shayi ni nan ,dai ahkaw ahkang
hpe  nchye  ai hte hkrat sum taw nga ga ai.

                  Anhte  hte  ni dik ai rawt jat sai Miwa Gumsan
Mungdan na Amyu Shayi ni hku nna hkam la ai lam langai mi nga ai. Dai
gaw Amyu Shayi ni a ahkaw ahkang hte La ni a ahkaw ahkang gaw maren
sha re ngu hkam la ma ai majaw lamu madin chyen mi gaw shayi num ni
rai nna, chyen mi gaw shadang la ni re nga ma ai.   Shayi num ni hte
shadang la  ni maren mara ahkaw ahkang hkam la, hkam sha nga ma ai lam
chye lu ai. Ndai lam gaw gara amyu a matu mung ahkaaw ahkang amaren
sha lu ai lam re majaw anhte Wunpawng  Amyu Shayi  ni mung lam shagu
hta gwi ai myit nden marai nga nga hte tsun shaga , galaw sa   wa yang
 anhte a hkrat sum taw nga ai



ahkaw ahkang ni mung gaw gap la lu wa na ga ai. Myit nden marai
nshayawm ai shawng de lahkam sa ga   ngu shatsam  nngai.

                  Mungkan ntsa e  hkum tsup ai ngu kadai mung nnga
ai., Ra ning ra ai  lam ni hpe tam gram , gaw gap magang masha a nga
sat nga sa madang mung tsaw jat wa magang re. Anhte Wunpawng Amyu
Shayi ni mung nnga ai kaw na nga ai de, nlu ai kaw na lu ai de, nchye
ai kaw na chye ai de , nbyin ai kaw na byin ai de, kaji ai kaw na kaba
ai de du lu na matu nhkring  nsa shakut ra saga ai.  Myu  shayi a
magam bungli hte Mungdan a magam bungli ni hpe shawoi na hta grau
shakut apnawng ga yang anhte a Amyu Shayi Hpung mung grau nna rawt jat
galu kaba ai, ngang kang grin ai uhpung uhpawng kaba langai mi byin
tai let Wunpawng Amyu sha ni hpe prat ban hte  ban  shakung shapan dat
lu ai, Amyu  Shayi ni byin hkra atsam dat shakut ga ngu matut shatsam
ai.

                  Myitrum ai Amyu Shayi ni hpe num htet mayu ai lam
langai mi nga li ai. Dai ni anhte  Wunpawng Myu sha ni hpe Ka-ni nang
hpam lu sha hte shamyit wa hkyen nga sai hpe yawng gaw dum chye nga
saga ai hte dai hpe lu makawp maga na matu ladat amyu myu shaw ra saga
ai. Dai majaw anhte myu shayi ni gaw tinang shangai da ai kasha ni a
kanu sha nrai, Myu a kanu, Mungdan a kanu ni rai ga ai kadai mung
kadai nga ai tinang a ginra na nang hpam lu sha hte  nse nsa lam hta
hten za taw nga ai Ram ma ni hpe hkye la lu hkra, mare Uphkang salang
ni, Makam Masham de na hpung woi ai ni hte  ta hkin dun mahkri shawn
myit mang shabawn nna ladat shaw hkye la na lam tam na hte  dut sha
hkrum ai kanau kasha ram ma myu  shayi sha ni hpe hkye la  na hte dut
sha nhkrum hkra makawp maga na lam ni hpe ja ja lit la ta tut galaw sa
wa  na matu mung htet shana dat  nngai.

                  Hpang jahtum hku nna ngai tut nawng tsaw ra kamhpa
nga ai ngai hte myit rum ai  Wunpawng Amyu Shayi yawng hte e… anhte
yawng gaw labau leng e jaw ai lit lu ai ni rai nga saga ai majaw
Wunpawng Amyu sha ni a sari sadang hpe sharawt shatsaw lu ai hte
Mungkan Mungdan na kaga Amyu Shayi ni zawn rawt jat galu kaba ai
uhpung uhpawng byin tai wa hkra, kam ai nkam ai, chye ai nchye ai
nngu, put ngun ai lam nnga ai sha, ang ai magam lit ni hpe nhprai hkra
tinang hta rawng ai atsam marai machye machyang ma hkra hte tinang nga
ai ginra buga ni hta gaw sharawt ai bungli, myu  sha  rawt malan magam
bungli ni hta myit mang jahkrum ta hkin dun shawng lam de lahkam sa wa
ga ngu shatsam let (4) lang na Wunpawng Mungdan Shanglawt Amyu Shayi
Masat Nhtoi na nye a shatsam mungga hpe hpung dim dat nngai law.

                                  Hpaure Hkawn Ja

                                            Ningbaw

                                 Amyu Shayi Hpung GinjawKomiti

                           Wunpawng Mungdan Shanglawt Amyu Shayi Hpung