Shanghtin

Wunpang Mungdan Shanglawt Hpung (KIO) gaw, jawngma myitrawt shamu shamawt ai wa, Shadang Kyang Ying hpe Laiza daju e sharen tawn ai gaw, bat mi jan du sai lam, Laiza shiga lawk kawn chye lu ai.

February 5 ya, Rawtmalan Poi ngut sai hte, Shadang Kyang Ying hpe Alen Bum hpyendap daju e sharen tawn ai raitim, Laiza Muklum kata e gaw hkawm sa hkawm wa lam, ahkang jaw tawn ai lam, KIO salang ni kawn chye lu ai.

Lit nga KIO salang ni tsun ai hta, "Shadang Kyang Ying hpe Laiza kaw nna n pru shangun ai lam madung gaw, shi hpe Myitkyina mare hta Myen ni hkan rim wa ai majaw re", nga ai.

Raitim, Myitkyina, Jan Mai Kawng mare hta nga ai, Shadang Kyang Ying a dum n'ta masha KNG de tsun ai gaw, "Pyada hte asuya masha ni kadai mung, dum n'ta de Kyang Ying hpe sa san ai masha ya ten du hkra tsepkawp n nga ai."

Ndai laman hta sha, KIO gaw laksan masha dat nna, "Kyang Ying hte seng nna hpa n tsang ra ai lam shiga hpe" Myitkyina, Manmaw hte Muse mare ni de sanglang ai lam ni, galaw wa sai lam, Laiza KIO shiga lawk kawn chye lu ai.

Ya na zawn Kyang Ying hpe, KIO ni sharen da ai lam gaw, February 1-5 ya laman, Laiza Muklum e galaw ai 47 ning hpring Rawtmalan Poi ten, shani shagu shapraw ai "Sinpraw Majoi Shi Htawn" shi laika hta, Myen a mungbawng zuphpawng (NC) hpe ninghkap ai ningmu tang madun ai majaw, rai nga ai.

February praw 6 ya shani na shi laika a laika man 8 e Shadang Kyang Ying a tingkyeng ningmu hpe tang madun tawn rai nna, dai ningmu hta, February 5 ya shana galaw ai, KIO Rawtmalan Shana Shat Sha Poi kaba hta "hkalum mungga" tsun ai, KIO Tingnyang-up Malai (2), Dr. Manam Tu Ja a NC a shawnglam masing hpe madi shadaw ga tsun ai gaw, "Mungchying masha ni hpe roi ai lam re hte, rawtmalan poi hte mung, n htap htuk ai majaw n ra sharawng ai lam" myit yu na matu, hpaji jaw tawn ai re.

Kaja wa ndai ningmu hta, Shadang Kyang Ying a mying hpe n ka tawn ai raitim, KIO gaw "Sinpraw Majoi Shi Htawn" editor hpung hpe atik anang masa hku nna, poi ngut sai hpang mung, KIO hpe hpyi nem tawngban ai lam, shi laika (February 7 ya nhtoi) hpe bai dip shapraw shangun sai re.

Dai shi laika hta, "editor hpung ni myi yu shalai nna, dai ningmu bang hkrup ai hte ndai ningmu madu gaw Shadang Kyang Ying (Myitkyina) re lam hpe mung", sanglang dan ai, rai nga ai.

Shadang Kyang Ying gaw, JLH (Jinghpaw Laili Laika hte Htunghking Hpung-Myitkyina Dakkasu) hpe hpaji jaw woi awn ai wa mung re lam, dakkasu jawngma ni KNG de tsun wa ai.

Ya na zawn, Shadang Kyang Ying hpe KIO ni sharen tawn ai lam n'tsa, J.W ramma hte dakkasu jawngma ni sha n ga, hpung woi sara ni hte mungchying masha ni grai pawt nga ai lam, buga kata shiga lawk ni kawn chye lu ai.