Shanghtin

Myen hpyendap, KIO magam gun masha marai (8) hpe rim

November 22, 2007
KNG

Dai hpawt sha, Dawhpum Yang Ginwang na KIO/A magam gun masha marai (8) hpe, Myen hpyendap kawn rim mat sai lam, KIA Dapdung 12 shiga lawk kawn chye lu ai.

Ya, rim hkrum sai KIO/A magam gun masha ni gaw, Dawhpum Yang Ginwang, Dingga Ninghtawn mu gun masha ni rai nna, dai hta—rung lithkam hte ningtau lihkam, rung chyare langai hte hpyenla (5) lawm ai lam, Dung 12 shiga lawk kawn chye lu ai.

Hpa majaw, ndai KIO/A mu gun masha ni hpe rim ai lam hpe gaw, ya ten du hkra, hkrak n chye shi ai raitim, KIO hte Myen lapran hpyen masa yak wa na kumla ni hpe mu lu ai lam, dai ginra na buga masha ni KNG de tsun dan wa ai.

Maga mi de rai yang, Myitkyina kawn sanat, machyu, pala, amyawk ni hte Myen hpyenla htaw tawn ai, hpyen mawdaw 15 jan gaw, Bala-min-htin Mali Hka Mahkrai kawn Waimaw hkran de lai di mat ai hpe mu lu ai lam, Myitkyina buga masha ni kawn chye lu ai.

Hpyen n-gun yawng 500 jan na re hpe buga masha ni myit sawn tawn ai rai nna, dai hta laklai ai lam gaw, asak kaji ai hpyenla ni hpe n mu ai sha, majan mahkrum madup nga sai zawn re ai, sak ram hpyenla ni hpe mu lu ai lam, myi-chyaw-mu buga masha langai, KNG de tsun dan wa ai.

Ya ten, Myen hpyendap, Waimaw lagaw dap Hka-La-Ya Masat 58 hte Shwinyawngpyin na Hka-Ma-Ya Masat 321 yan gaw, KIO Ginjaw Laiza grupyin hkan e hpyen masa shamu shamawt lam ningnan ni galaw nga ai lam, dai ginra na buga masha ni kawn chye lu ai.

Myen hpyendap gaw, Lajayang kawn Laiza de magaw shang wa ai, madung chyinghka hpe mung, ndai bat lahkawng ya shana hkying 9 p.m. kawn tsepkawp pat kau nna, ndai chyinghka kawn masha, mawdaw hte mawdaw saike pru-shang lam ma hkra hpe, pathkum ai lam, Lajayang buga masha ni hpe lakap let chye lu ai.

Lai wa sai bat kru ya shani, Myitkyina, Manmaw mare kaba ni kaw nga ai, KIO datkasa rung ni hte KIO/A du salang ni a dum n’ta ni kawn tara n shang Miwa phone ni hpe, Myen hpyendap maja shang rim wa sai hpang, ndai zawn KIO Ginjaw jung ai, Mali Hka a sinpraw hkran de Myen hpyendap law shamu shamawt wa ai, rai nga ai.

Ya, Myen hpyendap galaw ai sat lawat gaw, Hpawmi Awng San Su Chyi a ndai shata 8 ya shani na n’dau laika n’tsa, KIO gaw ninghkap laika shapraw na ningdang tawn ai majaw, hpyen asuya matai htang wa ai re lam, KIO ningbaw ni kawn chye lu ai.

About the author: Not specified